كتبت ساره تواتى
نصائح متخصصة ممكن تساعدك في إنك تحافظي علي أولادك من المضطربين والمتحرشين:
١- الإتفاق مع الطفل قبل النزول من المنزل أو العربية إنة يفضل جنبك وفى إيدك طول الوقت علشان إنتي بتحبية وكمان محتجاة يساعدك في شرا الحاجات. إبنك أو بنتك في إيدك طول الوقت أو ركبية فى العربية بتاعت السوبرماركت مهما إتضايق أو صرخ أو إعترض ماتسيبهوش يسيب إيدك أو العربية وفهمية بالراحة إنتى بتعملى كدا ليه. بيفرق قوى لما بنفهم الطفل السبب ونشركة في المسئولية.
٢- توعية الطفل مليون مرة وأرجوكي ماتزهقيش من التكرار وتعتبري انه فهم، كرري دايماً الكلام دا:
-محدش يلمسك خالص
-لو حد غريب لمسك صوت واصرخ وزقه،
-تعالي قول لماما او اي حد كبير،
-عرفية الأجزاء الخاصة في جسمة وان محدش ينفع يشوفها ولا يلمسها.
-لازم تدافع عن نفسك لو حد ضايقك
-متخافش لو حد ضايقك تعالي قولي.
- ماما وبابا بيحبوك وهايدافعوا عنك.
- جسمك دا ملكك لوحدك محدش من حقة يلمسة.
- محدش يحضنك من قدام او من ورا ولا تقعد علي حجر حد.
٣- برجوا كل الأمهات إنها تصاحب أولادها وتطول بالها عليهم. أنا عارفة إن الأم بيبقي فوق كتافها عبء كبير و مسئوليات كتير بيخلوها دايماً مضغوطة. بس انا برجوا كل أم رغم الضغط الكبير ، اللي ربنا يعينك عليه، خليكي هادية علي قد ما تقدري مع العيال. شفت حالات كتير جداً جداً بتتعرض للتحرش وبتخاف تروح تحكي علشان خايفة ماما او بابا يضربوها. دي من اكتر الحاجات اللي بتألمنى أنا شخصياً . ان الضحية بيلوم نفسة وبيعتقد إنه أخطأ ومابيحكيش ودا له أثر نفسى سيء جداً. نصاحب عيالنا علشان مايخافوش يقولوا لنا أى حاجة وكل حاجة مهما كانت.
٤- عدم الضغط علي الطفل لإرضاء الكبار. مش عايز يسلم مايسلمش، مش عايز يبوس مايبوسش، مش عايز يتزغزغ يصوت ويبعد ايد عمو او طنط ويقولهم لا. و انتي ماتلمهوش. احسن انه يتقال علي أولادك مش متربين من أنهم يتعرضوا للتحرش. انا مع احترام الطفل للكبار بس برضة مع احترام الكبار للطفل.
٥- علمي طفلك لو اتعرض لاي حاجه مش عايزها: تحرش، عنف ، عض، ي او غيرة يمشي ٣ خطوات :
أولاً: يقول بصوت عالي جدا: (مبحبش كدا) ودربية عليها علشان لما تسمعية بيقولها تفهمي فوراً ان في حاجة.
ثانياً: تانى إجراء لو اللي قدامة مبطلش بعد ( مبحبش كدا) ولسة بيضايقة وهيمد ايدة باي صورة انه يمسك ايدة ويصرخ بصوت عالي ( لااا)
ثالثاً: والإجراء الأخير لو لسه المعتدي سواء كبير أو صغير مبطلش ان الطفل يجري بسرعه علي اول شخص كبير ويقولة.
٦- خليكي شكاكة فيما يخص مين ممكن يتحرش و هيتحرش ازي وفين. المجتمع فية مرضى ومجرمين وعدوانين -زي اي مجتمع في الدنيا- فلازم تحرصي جدا لان اللي بيعمل حاجة غلط بيبقي عارف وبياخد حذرة علشان مايتكشفش وبيرعب الطفل ودا معناه الآتي:
- ولادك مايلعبوش عند الجيران.
- لو جالك ضيف يبات ولادك يباتوا جنبك علي الارض و لا في اي حتة بس لازم معاكي في الاوضه.
- طفلك مايبتش برة البيت تحت اي ظرف او اي عند حد مهما كان.
- الرجالة بتتحرش بأطفال صبيان زي ما بتتحرش بالبنات عادي جداً. وبرضة في ستات بتتحرش بستات.
مش قصدي اخوفك والهي بس بوعيكي وفي إحصائيات ودراسات عن التحرش والإغتصاب كبيرة للكبار والصغار خد حذرك ولاتثق في أحد مهما كان
طفلك امانة في رقبتك تسأل عنها يوم الدين
مرحباً بالتعليقات الجديدة .