أولادنا و المذاكرة
الحلقة الاولى
كتب د.أحمد جلال
==================
فى البداية
على فكرة احنا هنا مش بندى العلاج لمشكلة المذاكرة ... قبل ما نحلل المشكلة من كل جوانبها علشان نكون متفقين ومقتنعين مع بعض قبل ما نتكلم فى العلاج
==============================
معذرة أنا هرغى كتير معاك شوية بس إعذرنى ... لأن الموضوع فى غاية الاهمية جدا جدا جدا جدا جدا
فإستحملنى شوية وكمل معايا الموضوع للأخر .....
شكراً لك
علشان نكون متفقين
===============
يا جماعة الأم اللى بتذاكر لأبنها اللى فى الصف الخامس وبتحفظ إبنها اللى فى الصف الثالث وبتحسب لابنها اللى فى الصف الاول وبترضع إبنها الرضيع .. وفوق كل ده مسئوليتها فى البيت ....
أتحدى بعد خمس ست سنوات تكون بحالتها وبهدوئها وبتوازنها ...
معذرة يا جماعة ده شبة مستحيل
لأن كلنا شايفينه واقع فى حياتنا
الأم اللى بتبقى كده فبتكون أُستُهلكت عصبيا ونفسيا وجسديا وعاطفيا وكمان بتخسر ابنها وبتبنى حواجز بينها وبينه كتييييير
وللأسف ساعتها بتفقد السيطرة عليه ومبتعرفش تعدل أو توجه وبالاخص فى سن المراهقة
==============
لأن للأسف دى مش شغلتنا إحنا (التعليم له معلمين ) عارف انك هترد عليا وهتقولى ما هو المدرسين مش قايمين بالدور بتاعهم هقولك امشى خطوة خطوة معايا وتعالى نحلل الموضوع واحدة واحدة
=================================
أمهات كتييير بيقولوا تعبنا خلاص مبقاش عندنا طاقة جسدية ولا ذهن علشان نستحمل اللى بيعملوه الاولاد فينا وقت المذاكرة ؟
================================
هو الصح إيه ؟؟؟
إنى أذاكر ولا أتابع
فرق كبير طبعا بين
(أذاكر لإبنى) وإنى (أتابع إبنى)
=================================
تعالوا نتكلم عن النظام الأول
(أذاكر لإبنى )
النظام ده اللى بيحصل فيه كالتالى
**إن يومياً قاعد جنب إبنك فى المذاكرة (وركز فى كلمة جنب ) ومبيذاكرش إلا لما تكون جنبه وقاعد طول الوقت تقوله ( إعمل كذا وإمسح دى أو كمان تكون ماسك الاستيكة علشان تمسح له أخطائه ..ويا بنى إكتب كده ,, وصح كده وخطأ كده... ولو سيبته دقيقة تيجى تلاقيه معملش أى حاجة ....ومبيعملش اى حاجة الا لما تكون جنبه)
(وده نوع بنسميها الاعتمادية )
الابن بيبقى لاقى واحده قاعده جنبه وبتساعده وبتمسك له القلم احيانا علشان تعلمه وتكتب له أحيانا وتحل له المسائل واوقات كمان ممكن تحل له الاسئلة بنفسها وتكتب له بنفسها فى الكراسة
وبينى وبينكم ( اللى يلاقى دلع وميدلعش يبقى غلطان ....)
اللى بنعمله ده أكبر غلط فى حياتنا إن إحنا نعوده على انه يبقى اعتمادى ويفضل كده لغايه سنة تالته ورابعة لغاية ما الام متقدرش تشرح المنهج فتنسحب وتبعد عنه
فالطبيعى الطفل اللى واخد على كده وتربى على إن يكون إعتمادى أول ما تنسحبى بيبدأ هو مجهوده فى المذاكرة يضعف علشان مفيش العامل المساعد اللى كان بيساعده فجهده وطاقته تقل فيضعف مستواه التعليمى
وعلشان كده بتيجى الام تقول لنا ( اول ما اسيبه مستواه يقل )ما هو ده الطبيعى
وكمان لما يكون فى طفل واتنين اللى فى خامسة واللى فى تالته ويا سلام كمان لما يكون فى طفل رضيع
بيبقى ضغط كبير على الام جدا ما بين واحد بتفهمه والتانى بتحفظه والتالت بترضعه ...
كمان شوية الام هتتصل بنفسها على مستشفى المجانين وتقولهم (تعالوا خدونى)
الام فى الفترة دى بتلزق (حلوة كلمة بتلزق دى ) جنب الطفل وهو بيذاكر وعلشان كده الطفل فى السن ده بيبدأ يتعود (يتعود) وبيترسخ فى عقله الباطنى لزقتك جنبه
ويترسخ فى ذهنه كمان ان ماما لازم تبقى جنبى (امال مين يمسح الخطأ ويعدل ويمسك القلم ...وكده ...)
وعلى فكرة ابنك ده لو مع المعلمة هتلاقيه بيكتب زى الفل وعلطول بس هو علشان اتعود انه يدلع معاكى فخلاص (يا ماما تعالى اقعدى جنبى ... يا ماما تعالى قوليلى دى بتكتب ازاى ...ويسألك فى كل حاجة ؟؟؟
مع العلم إن اللى بيسال فيها وبيقول مش عارف كان كتبها وحاللها الصبح مع المعلمة عادى جدا بدون اى مساعدة ... بس انا قلتلكم ( اللى ما يلاقيش دلع وميدلعش يبقى غلطان ....)
وخلاصة القول
إن نظام مذاكراتنا للأولاد بالشكل ده فاشل وجدا كمان
=========================
أنا حبيت أعرض الموضوع الاول كده بالشكل ده
علشان تقولى الكلام اللى بقول بالفعل ده بيحصل ولا لا وطبعا مش مع كل الناس
وهل موافقنى الرأى ولا لا ؟؟؟؟
علشان نكون متفقين فى ده قبل ما نكمل نقول هنعالج ازاى
=======================
وعلشان متعبكش معايا هكتفى بكده النهارده
وانتظرنى بكره نتكلم عن النظام التانى
دعواتكم
================================
مرحباً بالتعليقات الجديدة .