السلام عليكم ورحمة الله وبركاته
ابنى عنده 3 سنين دايما بيغلط حتى لماىبنحاول نوجه نشاطه أنا ووالده بس بيفشل فى اغلب الحاجات مع انه ذكى جدا فى الواقع
ردت د.سالي عبد المنعم
أخصائية علم النفس وتعديل السلوك
الحل عزيزتى هناك أسباب كثيرة جدا يمكن أن تجعل طفلك يكرر الخطأ
1- عدم قدرة الطفل على ضبط نفسه أو اصلاح سلوكه
و دة طبيعى فى الأطفال لان سنهم صغير اوى على انهم يصلحو او يعدلو من سلوكهم
يعنى مثلا ممكن طفل عمال يعيط و انتى مدايقة من صوتة و تقعدى تزعقى اسكت اسكت و هو ميسكتش ....و تقولى دة عنيد ...لكن الحقيقة انة مش عارف يسيطر على نفسة لان سنة اصغر من انه يقدر يتحكم فى نفسة و يظبط انفعلاتة .
مثال تانى ..فى سن 3 سنين مثلا بيبقى طبيعى جدا فى الطفل الانانية و يحبو ياخدو و ميدوش ....تيجى انتى تطالبيه انه يدى حاجة او يعمل عمل معين ...هو ممكن يرفض ...مش علشان هو وحش لا علشان دة ضد طبيعتة فى المرحلة العمرية دى .
2- الجهل و عدم الفهم الصحيح للامور
خدى بالك انة معندوش وعى زى وعى سيادتك !!
لازم انتى اللى تنزلى لمستوى تفكيره مش تطلبى منه ان هو اللى يطلع
3- حب الاستطلاع
و دا طبيعى فى السن دا و لازم نشجعه مش نحبطه
مثال شائع ::الطفل اللى يطلق عليه الطفل المخرب
تلاقى ابنك عمال يقلب فى البيت و يفكك فى اللعب بتاعته و انتى بقى تزعقى " انت على طول كدة تكسر اللعب و تبهدل الدنيا ....مش هاجبلك لعب تانى "
هنا الغلط مش منه دة منك أنت
يعنى هو طبيعى انه يحاول يكتشف و انتى عليكى تنمى الحكاية دى او تقتليها
و لما تقتليها مترجعيش تزعلى و تقولى هو ليه معندوش ابداع!!
لو فتح لعبة علشان يكتشفها شاركيه اكتشافة و افرحى بيه بدل ما تحبطيه .
و هنا لازم تفرقى بين انة بيكتشف او انة بيتعمد التخريب فعلا او بهدلة الدنيا ...ليه بقى ؟؟
لان الحالة الاولى علامة صحية .....اما التانية علامة مرضية تدل انك غلطانة فى التعامل معاه و لازم علاج .
4- لفت الانتباه
دى مهمة اوى ....ممكن يكون هو مش حاسس باهتمامك بيه و نفسة تهتمى بيه فيعمل قلق بس علشان يقولك انا اهو ...
5- الفراغ عند الطفل
و دة بيعمل له ملل و الملل يخلى تصرفاتة مش مظبوطة و متلوميهوش على كدة ....لا نلوم نفسنا لاننا احنا اللى لازم نشغل وقتة بحاجة مفيدة .
6- حب اعتماد الطفل على نفسة .
و هنا طبعا لازم يغلط و لازم انتى تسيبية يغلط و يتعلم من الغلط الصح ....لازم نسمح للطفل بالتجربة و نسيب له مساحة من الغلط على يكبر الطفل دة على الثقة بالنفس و التقدير للذات .
7- شعور الطفل بانه مفتقد شيئا ما ....و دة ممكن يكون :الاكل الجيد
الحب فى الاسرة
الامان
التقدير
تحقيق ذاتة و تجربة الامور بنفسه
يبقى احنا دلوقتى علينا اننا قبل ما نعاقب على السلوك السئ و الغلط لازم نعرف الدوافع الحقيقية ورا السلوك دة علشان يبقى العقاب تاديب و ليس تعذيب .
مرحباً بالتعليقات الجديدة .