العادة والسعادة بقلم الكاتب إسلام حمدى

العادة ، والسعادة ..
______________

عندي عادة بستمتع جدآ وأنا بعملها ومش عايز أبطلها ، بالرغم من إني مش لاقي أي إستفادة منها ولا عارف أنا بعملها ليه ..

العادة دي هي التفكير والبحث المستمر عن أصل كلماتنا العامية ، أو عن سبب تسمية الأسامي والمناطق ..

فلو ركبت ميكروباص مثلآ وماشي قدام مستشفى الأمراض التنفسية اللي في مصر الجديدة ، أقول أكيد عشان كده سموا المنطقة دي منشية الصدر .. الصدر عشان التنفسية ، ومنشية أكيد جايه من منشأة ..

كلمة (محلاها) أصلها ما أحلاها ، كلمة (كده) أصلها هكذا ، واللي هي في ليبيا (هكي) .. وكلمة (ليه) أصلها لماذا ..  وهكذا بأه ، (عشان) أصلها من شأن ، (بص) من أبصر .. .. ..

طبعآ في كلمات كتيرة مش بقدر أوصل لأصلها ، زي (برضو) ، و (إزاي) ، و (إشمعنى) .. وكلام تاني كتير .. لكن ده مايمنعش إني بحاول برضو ..

طيب أنا بقول كل الكلام اللي مالوش لازمة ده ليه ؟

عايز أقول إن أي حاجة إنت بتعملها وتبسطك ، ماتوقفهاش ..
أي حاجة بتحسسك إنك بتعمل إنجاز ولو بسيط ، كمل فيها ..
ماتفكرش في الإستفادة من أي عادة ، طالما مالهاش ضرر على أي حاجة ..

إبسط نفسك بنفسك ، وإتبسط بنفسك لنفسك ..