ناس وناس
بقلم-نهي نصر
ناس وناس
الدنيا دي انا شوفت فيها حاجات ليها العجب
فيها ناس عندها قلوب لكن من غير احساس
وفيها ناس جواهم قلوب تتاقل بالدهب
فيها ناس عقولها الله اعلم بيها
وناس اخلاقها تعدت كل حدود الادب
في ناس تخبي النعمة عشان خايفة من الحسد
ناس تانية تحب تتفاخر ان فلوسها مالهاش عدد
ناس تظلمك وبعدين تجيب الحق عليك
وناس من قلبها تحبك وكمان تخاف عليك
في ناس تبكي عشان تاخد حق مش ليها
وناس دموعها صادقة وما حدش حاسس بيها
ناس تقف جنبك لله كدة في لله
وناس تساندك عشان مقابل بتستناه
ناس تكدب وتحلف وتتصدق
وناس صادقة وللأسف ولا بيفرق
في ناس تتضايق منك اول ما تشوفك
وناس ترتاحلك قوي اول ما تلمح طيفك
في ناس من أول لحظة تتمنى تقرب لها
ولكن بعد شوية ممكن تتخنق منها
وفي ناس بعد فترة تلاقي نفسك بتحبها
وناس من اول نظرة بتدوب في حبها
في ناس ممكن صوتها يطمنك ويدفيك
وناس وجودها كأنه جبل ووقع عليك
ناس عندها عيال لكن مش عارفة قيمتها
وناس عشان ظفر عيل تبيع كل اللي حيلتها
في ناس قادرة تساعدك بس ما بترضاش
وفي ناس مهما يحصل عنك ما تتخلاش
وفي ناس لما تحتاجها تلاقيها منتهى الشهامة
وناس وقت عوزتك تقولك مع السلامة
في ناس رايقة وفي ناس مغرورة
وفي ناس راضية وناس مقهورة
في ناس تحت وناس فوق
وناس تايهة ومش عايزة تفوق
في ناس فرحانة وناس زهقانة
في ناس واخدة الشر وسيلة وناس مسالمة وقليلة الحيلة
في ناس مش فاهمة وناس متفاهمة
ناس بتفرح وناس بتجرح
ويادنيا انا شوفت فيكي العجب
فيكي ناس بجد ليها العجب
