من ذكرى مارس
شعر بقلم / احمد الشمسي
الليل امان
خرج دموعك دون ما تخجل م القمر
شغل شريط الذكريات
واظبطها ع النمط البطئ
البحر دايما ف الجراح
نعم الصديق
اكمنه يعني ملوش قرار
سرك اكيد قبل النهار
هيكون غطس
قبل المراكبي ما يلحظه
وان بلعه حوت
اياك تفكر انه ممكن يلفظه
النيل وفي
ما كانوش أساسا عملو عيد
واشمعنى لو ذكر الوفاء
يبقى ما بين راجل وكلب
عاشق ونجمة ف السما
ورد وجنايني بيحرسه
طاب يجرا ايه
لو كان ما بين اتنين صحاب
عاشق وعاشقة
اتواعدو علي عدم الغياب
او بين جنايني ودنيته المليانه شوك
انا كل ما أوصل لليقين
بتاخدني بالحضن الشكوك
كان شهر مارس لسه بيزق الشتا
البرد مَوّت مية علاقة بغير شفقة
اما المطر عامل مساعد ع الحنين
بس القواعد خير خاضع للصدف
كان الشتا له ويا قلبي حظ اخر مختلف
كانت غريبة ف كل شيء
كَت عارفة ان جمالها
زَوّد ف الضحايا بدون حساب
وان البساطة اللي ف كلامها
هي مفتاح العذاب
يعني اللي واقف اخره يسمع كلمتين فيحبها
اقسم لكم ان المبالغة ف كل شيء
إلا كلامي ف وصفها
كان بعدي ايه غير حل فاشل للهروب
يا صاحبة الروح الطيوب
والجاذبية العظمى من بدء الحياة
الموت نهاية عشقي فيكي ومبتداه
الشوق مرض
صورك وكل التسجيلات دي مسكنات
ما وفتش ابدا بالغرض
جه معاد اذان العاشقين المحرومين
كنت الامام
انا كنت اضعف ما يكون وقت الخصام
(الشعر يستدعي الغرام )
عفواً ضياء.. الشعر يستدعي الانين
الشعر لغة الموجوعين والمكبوتين
الشعر حاصل جمع حزنك والليالي
اللي ف فراقها
الشعر حاضر لما كان حاضر غيابها الراعي شاعر
والقصايد كالغنم
والناي ببشبه للقلم لحظة هروبهم م الالم
من حلم وردي واتسرق
الناي بينزف حبر من شريان ف قلمي علي الورق
انتي البعيدة ف كل شئ
وانا املك ايه الا اللاشئ
يا صاحبة القلب البرئ
الليلة عيد
بس الاكيد مش ليا انا
مضطر اكمل ف الصيام
مضطر ازود بعدنا
الفجر شقشق يلا روح اوضتك ونام
البحر دايما في الجراح نعم الصديق
لكن ساعات بيصيبه داء الانفصام
