مسائكم همسه من القلب
كتب - يوسف الشرقاوي
تدق علي قلوبكم لعلها تفتح باب ندخل منه لركن المشاكل في حياتنا الزوجيه
انت وزوجتك مش مجرد شريكين في تجاره تختلفوا فيها علي الربح والخساره
اللي بينكم رباط وميثاق قوي بتصغر قدامه كل انواع العلاقات الاجتماعيه لكن...
الموضوع محتاج شويه تنازلات وعفو وتسامح لانكم في سفينه واحده وبتواجهوا عواصف كتيره منها علي سبيل المثال
"العناد"
العناد صفه موجودة في الراجل والمرأه
فالراجل بيشتكي عناد الزوجه وتصلب رأيها
والزوجه شايفه ان العناد هو السلاح الوحيد اللي تدافع به عن نفسها امام استبداد الزوج وتمسكه برأيه... ومن هنا تبدأ المشاكل
من اسباب العناد بين بعض الازواج بيكون
اما انه بيرجع لاسلوب التربية الخطأ في الطفولة وكلكم بتشوفوا الاطفال بيتمسكوا برأيهم والاباء بتنفذ طلباتهم وده بيتحول لتمرد وعناد
او ان الزوج بيقلد الاب لانه اتربي في بيت بيسطر عليه الاب او البنت اتربت علي سلوك امها المتحكمه والمسيطره علي البيت وكل واحد بيحاول يقلد ده
واحيانا بيكون العناد نتيجه لعدم تكيف الزوج مع الزوجه والشعور باختلاف الطباع
فبيكون العناد صوره من صور التعبير عن الانسجام في الحياة الزوجية
او استهتار احد الزوجين برأي الاخر واستهزاءه به
وربما ياتي عناد الزوجه من الزوج نفسه اما انه يتجاهلها او يحتقر رأيها
العناد اساس خراب بيوت كتير وبيأثر علي اطفالنا وسلوكهم وحياتهم
تعالوا...
نترك العناد ونتخلص منه ويكون هناك حوار ومناقشه راقيه
بلاش كل واحد يتشبث برأيه لازم نسمع لبعض ونقدر ونحترم وجهه نظر بعض
ونبعد عن الجدال والخلاف علي مسائل صغيره
ونركز في حياتنا وتربيه اولادنا ونبعدهم عن خلافتنا ومشاكلنا
حياتنا لازم تكون قايمه علي الالفه والحوار والمناقشه
نتحاور ونتشاور كأننا اصدقاء واصحاب ونقرب من بعض ونتعامل علي اسس العلاقة اللي حددها رب العزه لنا
ايوه انت راجل
لك حق الطاعة من زوجتك لكن هي كمان لها حقوق عليك منها الاحترام والتقدير لرأيها وشخصيتها
وانتي كزوجه اعرفي ان العناد اول خطوه في طريق تدمير بيتك واسرتك
عزيزي الزوج
كن لها امير تكن لك ملكه
وتذكر قول المصطفي صل الله عليه وسلم
(استوصوا بالنساء خيرا)
وانتي اختي الزوجة
كوني له ارضا يكن لكي سماءا
وتذكري قول الرسول الكريم صل الله عليه وسلم
(لاتؤدي المرأة حق ربها حتي تؤدي حق زوجها)
يارب دايما تكون حياتكم سعاده
