قصيدة ( لجل الهوى)

قصيدة ( لجل الهوى)

 

بقلم - محمد غانم 

 

 لجل الهوى ..
قررت اقدم محتوى ..
ملهوش علاقة بالاكتئاب ..
جايز كلامى يكون غريب ..
جايز يكون كداب ..
بس الاكيد ف الوقت ده ..
لازم نقرر لـ نسحاب ..
لجل الخروج ..
من واقع النص الكئيب ..
ودخولى نص المعشقة ..
الكلمة كانت مشنقة ..
والقلب ظل ف شرنقة ..
دلوقتى اصبح م الطيور ..
مين ده اللى قال العشق بور !!
طب مين بيهزم 1000 سور ..
وبيرمى روحه ف محرقة !!
لجل اما تبقي مصدقة ..
- كلمة بحب -.
القلب كل م اغطسه ..
يرجع يقب ..
الحب اصبح طوق نجاه
وانا لحمة حمرا ..
الروح بتبدأ فيه تدب ..
-هي-
سبحانه لما خلق م الطيبه جسم وعود ..
رسم الحنان فيها..والورد زرعه خدود ..
كان أخر العنقود ..
بيسّقي نبض القلب ..
فبيطرحولي ورود ..
-هو-
مجنون بيعشق بنت بالقوة ..
سفاح بيسفك القلوب بجناح ..
يظهر فـ صورة للجميع كملاك ..
وردة يدوب متفصله بـ أشواك ..
منزوع فؤاده ف وجعُه من جوا
هى ..
بتصنع من روحها سفينه نوح ..
وبتنقذ الاشياء الطيبة جواه ..
قبل طوفان السوء ما يلهبه بناره ..
كل الجميع إتصابوا -منعوا البوح-
كل الجميع إلاه ..
شعبط دموعه بروح
يبكى يقول الله ..
هو ..
كل العيوب اول ما وصلو الشط ..
اتبخروا وطاروا ..
مكنش يحلم قط.
ف يوم يسيب كاره ..
فازاى تكون هى .. بتسلسل النية
وتغير الاحساس ..
بتحط ايدها ع التراب ..
فبسرعة يقلب ماس ..
وتبدل الغربة ..
بـ كام صديق وناس ..
أنسيه !!
ﻷ .. حورية ..
عصفورة ف الغية ..
قلبى ملوش دية ..
عاشقك وعدى النار ..
درويش بيسكن غار ..
كان من يومين وسواس ..
عايش ف وسط الناس ..
ولا مينا ولا مرسى ..
قلبه يكاد يقسى ..
دلوقتى اصبح زار ..
يا ضحكة وسط الدمع ..
مديون انا ليكى ..
كلمة ونظرة وسمع ..
كنت بدونك شئ ..
تايه ف وسط الجمع ..
دلوقتى أصبح دار ..
مبنى يدوب ليكي
فاسبينى ف عنيكى ..
كما سرب هاجر من بلاد لبلاد ..
لقى طير جريح مرمي ف وسط اليم ..
طيب جروحه .. و رد روحه ..
وشال همومه فوق كفوفه
وضمه فرد جوه عيلته وطار