الكشرى المصرى

الكشرى المصرى 

 مقدم من مطبخ: نجلا النجار 

مده التحضير 10 دقايق 

مده الطهى ساعه 

المقادير 

مكرونه مشكله ممكن اكتر من نوع

عصير طماطم 

بصله مبشوره ناعم

حمص مسلوق 

عدس بنى 

أرز 

شعريه 

زيت كتير

توم 

ملح 

فلفل

كمون 

شطه

بصل حلقات للتحمير 

الطريقه

أولا وقبل أى شئ تعالو نحمر البصل نقطعه جوانح ومش لازم نضيف عليه نشا او دقيق أهم حاجه يكون الزيت سخن عميق ونضع البصل فى الزيت ونفضل نقلب فيه لحد مايحمر ويقرمش وأفضل بصل للتحمير البصل الأبيض وبعد البصل ميحمر ويقرمش نضعه فى مصفاه عشان يتخلص من كل الزيوت الى فيه وخلصنا اهم شئ ليه بقى تعالى اقولك عشان انا عوزه الزيت الى حمرت فيه البصل هو ده الى هعمل بيه كل حاجه فى الكشرى ده 

والحمص بيتنقع 12 ساعه ونسلقه 

تعالى بقى نعمل المكرونه 

طبعا كلنا عارفين المكرونه بتتسلق ازاى بس هقول هى بتتسلق ازاى حله على النار وفيها ماء كتير وملح وزيت بس زيت من الى حمرنا فيه البصله وبعد الغليان نسلق المكرونه عادى خالص وتعالى أقولك التكه الى هنا بقى احنا صفينا المكرونه تعالى فى حله وحطى شويه زيت حلوين كده من الزيت الى حمرنا فيه البصل وعلى النار يسخن وحطى ملعقه كبيرة كزبرة ناشفه فى الزيت وقلبى وضيفى المكرونه المسلوقه عليهم وقلبيها مممممم ريحتها وطعمها تحفه وسبيها على جمب 

تعالى بقى نعمل الصلصه 

هاتى حله على النار ونضع فيها زيت من الزيت الى حمرنا فيه البصل ونبشر بصله وسط ونشوجها فى الزيت لحد متحمر ونضيف لها فصين توم مفروم ونقلب كويس ونضيف بقا الخل والريحه ايه ممممم لازم تجربيها وبعدين عصير الطماطم وملح وفلفل وكمون وقلبى وسبيها تتسبك وتتقل ضيفلها ملعقه سكر وكوب ماء وسبيها بعدها خمس دقايق على النار واطفى 

وتعالى نعمل الشطه 

ايوه الشطه هو الكشرى يبقى كشرى الى بالشطه 

هاتى طاسه على النار ونضع فيها زيت من الزيت الى قلينا فيه البصل ونضع شطه زى ماتحبى حطى بقى وولعى الدنيا وقلبى كويس وهاتى مغرفتين من الصلصه بتاعه الكشرى وقلبى تغلى واطفى عليها 

تعالى بقى نعمل الدقه

الدقه بتكون على البارد 

توم مفروم مع عصير ليمون وخل وماء وكمون وقلبيهم وبس 

تعالى نعمل العدس البنى 

بننقعه قبلها بساعتان ونصفيه ونضعه فى حله على النار ونضع ماء كتير عشان عوزة الميه بتاعت العدس ملح وزيت من زيت تحمير البصل ويغلى غلوتين ونطفى وممكن تكملى سواه لوحده بس انا هضيفه للأرز 

الشعريه 

حله على النار بها زيت من زيت التحمير ونضع الشعريه ونقلبها تتحمر ونضع الأرز ونقلب يسخن ونضع العدس وماء العدس ونضع ملح ونقلب ويترك ليسوى بالف هنا

مديرة مطبخ مجلة مملكتي أ هاله طارق