مقدم من مطبخ ايمان كامل
مدة التحضير ساعه
مدة الطهى 10دقايق
المكونات
3 اكواب شوفان الحبة الكاملة - بنستخدم الشوفان زي ما هو مش حنضربه في الكبة و لا حاجة -
ثلاثة ارباع كوب دقيق ابيض
ثلاثة ارباع كوب زبدة طرية بدرجة حرارة الغرفة = 150 جم
كوب سكر بني
كوب زبيب
بيضة واحدة بدرجة حرارة الغرفة
نصف معلقة صغيرة بيكنج صودا ( كربوناتو )
نصف معلقة صغيرة فانيليا
نصف معلقة صغيرة قرفة
نصف معلقة صغيرة ملح
الطريقة : .
نهائي مافيش تبديل او تعديل في المقادير , نفس المكتوب بالظبط في المقادير و طريقة العمل هو اللي نعمله
- الشوفان المستخدم للوصفة هو شوفان الحبة الكاملة ( whole grain ) , ما ينفعش الشوفان سريع التحضير او الشوفان الابيض لانه مش بيحافظ على قوام المخبوزات
- جميع المقادير بدرجة حرارة الغرفة , و الكوب المستخدم للمعيار هو مج الشاي الزجاجي و بنعاير بيه كل المقادير
- ممكن بدل كوب الزبيب نستخدم حبوب الشوكولاته للوصفة , و نستخدم كوب كامل منها بدال كوب الزبيب
- المقادير بتعمل 800 جم , او 32 حبة كوكيز نفس الحجم و الحبة الواحدة فيها 65 كالوري
1- نغلي مقدار من الماء على النار , ثم يرفع الماء المغلي من على النار و نضيف اليه كوب الزبيب و يترك جانبا من غير غطاء و لا حاجة , نعمل كده علشان الزبيب يحتفظ بطراوته اثناء الخبز و ما ينشفش
2- ينخل الدقيق الابيض , الفانيليا , الملح , القرفة , البيكنج صودا و يقلب الخليط ثم نضيف الشوفان و نقلب مرة ثانية
3- في وعاء الخفق - ممكن تستخدم المضرب اليدوي - نخفق الزبدة لمدة دقيقتين تقريبا حتى تنعم و يفتح اللون قليلا
4- نضيف السكر البني و نخفق , ثم تضاف البيضة و يقلب الخليط جيدا حتى تتجانس المكونات تماما
5- يضاف خليط الدقيق الابيض مع الشوفان للخليط السابق و نقلب جيدا , ثم يصفى الزبيب تماما من الماء مع الضغط عليه باليد علشان ننزل كل الماء الوجود فيه ثم يضاف لخليط الشوفان
6- تقلب المكونات جيدا حتى تتجانس تماما ثم تغطى و توضع في الثلاجة لمدة نصف ساعة
7- يسخن الفرن على درجة حرارة 180 درجة , نخرج العجينة من الثلاجة و تبلل اليد خفيف جدا بالماء و نبدأ في تشكيل العجينة الي كور صغيرة , ما نكبرش الحجم لانها بتفرش جدا في السوا , نعملها في حجم العملة المعدنية او اكبر سنة بسيطة
8- ترص الكور في صينية الخبز و نضغط عليها خفيف جدا باليد و تترك مسافات بينها في صينية الخبز , ما ننساش انها بتنفش جدا في الخبز
9- نضع الصواني في الرف الاوسط للفرن بالظبط 10 دقايق و نطلعها , حنلاقيها طرية جدا و نحس انها ما استوتش , نسيبها برة و هي لما حتبرد خالص بتمسك و تظبط , ما ترجعش الفرن تاني و ما نحاولش نحركها من صواني الخبز و هي ساخنة لانها حتتفرفت
10- عندما يبرد الكوكيز تماما يرفع من الصواني و يحفظ في علب مغلقة بعيدة عن الضوء و الحرارة .....
مرحباً بالتعليقات الجديدة .