يوميات مستكة وحركات متفبركه

يوميات مستكة وحركات متفبركه
فكرة وإعداد الكاتبه : نرمين يسرى

الامتحانات
صوت مستكة جايب للشارع
ماهي أصلها وقت امتحانات
اللي يشوفها يقول بتصارع
مستر تايسون في ذهبيات
مستكة تنده كده براحة
هاتلي يابني كتاب الدين
سمع يلا سورة التين
ابنها تنح وما سمعش
ومستكة تصرخ بقي وتولول
وكأنها ماشية ورا نعش
وتقعد تندب حظ عيالها
يادى الوقعة السودة الطين
هما عيالي ليه فاشلين
....
شوية وتنده
حفظتي يا بنتي نص العربي
يانهار اسود
قاعدة بتقري أدهم صبرى
وتندب تاني
يادى الوقعة السودة الطين
 هما عيالي ليه فاشلين
......
سيد قاعد بقي مش عجبه
قاعد نافخ بقه و حاجبه
كل شوية يقول اتكلم
ولا استني وارضي واسلم

لا مش قادر
ايه ياسكينة ...
طول اليوم نزللنا زعيق
التعليم مش بالتهزيق

مستكة قالت الله ينور
قوم ياحبيبي اشوف ازاى هتعلمهم
ما انت عندك طولة بال وهتفهمهم

وانا عن نفسي هدخل املا البانيو واعيش
وانت اتعامل بقي يا حِنيّن متندهليش