هل الفوضى والكراكيب وصلت لثلاجتك أيضا ؟؟؟ اليكي الحل !

 كتبت - ناريمان كمال

هل هي عبارة عن دولاب بترمي فيه الاكل وتنضفيه من وقت للتاني؟؟

طيب النهاردة ان شاء الله حنتكلم عن تنظيم وترتيب التلاجة

بترتبي تلاجتك وتنظميها ازاي ؟؟

لازم نتفق على اساسيات الاول

1- لازم تنضيف التلاجة يتم على فترات متقاربة

بس ده مش معناه ان لو حاجة اتدلقت او عملت بقعة تسيبيها

عموماً اي حاجة نضفيها اول بأول عشان تحافظي على اجهزتك

وافتكري ان دي نعمة غيرك مش لاقيها

2- حطي في التلاجة فحم دايما عشان يمتص اي ريحة تظهر

بالذات ان في اصناف ريحتها " بتكرف " على باقي الأصناف

3- مفيش ابداً حاجة تتحط مكشوفة

لأنها ببساطة ريحتها وطعمها حيغير وتترمي

وممكن تبوظ حاجات تانية جنبها

4- اوعي تبيتي اكل في حلل في التلاجة

شكله مش عاطفي بالمرة

غير انه مع الوقت بيبوظ ادوات المطبخ

5- لازم يكون عندك علب تلاجة

طبعاً الزجاج او البيركس هما الاحسن

بس مشكلتهم في الكسر

ممكن لو تحبي تجيبي علب بلاستيك نوع نضيف واستخدميها

ندخل في المفيد

ايه العدة اللي حنستخدمها ؟؟

1- بخاخة فيها مية وديتول واي منظف بيريحك

2- فوط او قماش للتنضيف

3- مجموعة من السلال baskets

4- مفارش تلاجة، ودول اشكالهم كتير وسعرهم معقول اوي

نبـــــــــــــــــدأ:

طلعي كل حاجة ع الرخامة او ترابيزة جنبك

اغسلي كل الارفف وسيبيها تنشف

افرشي المفارش بشكل مرتب

وابدأي فرز الاكل اللي في التلاجة

الفاكهة والخضار اغسليهم كويس وحطيهم في علب مناسبة بالشكل ده

او ممكن في سلال

بالنسبة للأجبان واللانشون والحاجات اللي بتستخميها يومياً للسندويتشات مثلاً

برضه حطيهم في سبت او سلة واحدة

حتسهل حركتك وتسعفك في الوقت

وكمان حتساعدك في ترتيب التلاجة بدل ما كل طبق يكون في مكان

المخللات والزيتون وأنواع الجبن المختلفة تفضيهم على طول في علب بلاستيك

ولو انتي بتشيلي مثلا بهارات صحيحة او مكسرات في التلاجة

يبقى لازم تحطيهم في برطمانات زجاجية شفافة

او تجمعي الاكياس كلها في box واحد محكم الغلق

ولو خضار من اللي بيبوظ بسرعة حطيه نضيف وناشف في العلبة وكمان حطي تحته مناديل مطبخ

وبالنسبة للفريزر

حاولي دايماً الحاجة تكون مبططة او في اصغر مساحة ليها

يعني مثلاً السوائل انا باحطها في علبة مستطيلة ولما تجمد انقلها في اكياس بلاستيك

وبكده بتاخد مساحة اقل

وباقي الحاجات اللي سهل التحكم فيها افرديها

وفي فكرة كمان لقيتها في منتدى اجنبي

انك تستخدمي الفولدرز بتاعت حفظ الورق عشان ترتبي الفريزر

وممكن برضه تستخدمي السلال

وعلى فكرة السلال في منها مقاسات كتيرة

واسعارها بتبدأ من 2ونص

وحتلاقيها في كذا مكان بسهولة

يعني اللحوم في واحد

والخضار المجمد في واحد

والعيش مثلاً او البطاطس في واحد

استمتعي معايا بالصور الحلوة دي لتلاجتك بعد التنظيم

شاركوني آراؤكم