كتب سالي عبدالمنعم
أول وأهم نقطة مع الأطفال هي احترامهم ككائنات مستقلة.. وإني أتعامل معاهم كفريق في شركة مش هتنجح غير لما إحنا الأثنين نرضى.. لو بتعامل ابنك ك "عيل مش فاهم" أو ملكية ليك عايزها تقول نعم وحاضر وبس.. فعمرك ما هتستمتع بحب ولادك ولا علاقتك بيهم.
في البداية مهم نفهم لماذا يحدث العند؟ ما يسببه؟
أولا ً فيه عند صحي وعند ناتج عن مشكلة.. العند الصحي هو وسيلة الطفل إنه يعبر عن رأيه وهويته واستقلاله وإرادته الحرة.. فالطفل السليم نفسيا طبيعي إنه يتمسك بما يريد..
نقول مثال:
الطفل يريد اللعب بالكرة في غرفة المعيشة.. والأم قالت أنه غير مسموح باللعب فيها.. الطفل لم ينصاع وصمم يكمل لعب.. ليه طيب؟ أول تدريب إنك تفكر لو إنت مكانه هتحس بإيه..
أكيد لما يتمسك بلعب الكورة شئ ممتع أكتر ما يسمع كلامك لأنه مش مهتم بكسر التلفزيون ولا التحف.
يبقى هو بيعند ويقول لأ عشان:
١- لو سمع كلامك هيتألم لأنه نفسه يلعب كورة.
٢- لأنك استخدمت صيغة أمر من غير ماتشرح ليه ومن غير ما تحسسه انك بقرارك هتضايقه.. ففشلت إنك تعترف بالضيق اللي هو حاسس بيه ( التعاطف).
٣- لأنك لم تعط بدائل مرضية..
٤- لأنه غالبا بيقلدك.
ايه الفيلم ده كله! إحنا مش دكاترة نفسيين وعندنا بلاوي ورانا ومافيش صبر لكل ده.
المفاجأة إنك لما تطبق الآليات اللي جاية اللي هتحتاج ذكاء أكتر من المجهود وشوية صبر هترتاح قدام لأنك هتكون دربته على احترامك واحترام نفسه بدون الداع للصراع.
طيب متى يكون العند مشكلة؟
عندما يزيد في الحدة عن كونه مجرد تعبير عن رغبة.. لما يوصل إنه يكون تحدي أو غيظ أو تعمد إحراج الأهل. لما يكون سببه الأهل..
فما هي آليات تعديل سلوك العند لسلوك أكثر موافقة وأقل حدة واختلاف؟
وقت ما يحصل الخلاف..
١- اسمع ابنك باهتمام وافهم هو مش راضي ينفذ طلبك( مش أمرك) ليه.. خايف؟ مش عايز؟ لما تفهمه هتعرف إزاي تعمل النقطة التالية.
٢- ( اشركه في اتخاذ القرار) اشرحله إنت بتطلب ايه ليه واديله بدايل يكون اسهلها اللي انت عايزه ( مثلا انت عايزه يمشي من النادي.. فبدل ما تقوله يللا هنمشي حالا.. هتقوله إحنا هنمشي كمان ٥ أو ١٠ دقائق.. لو رفض .. هتقوله طيب نقعد شوية كمان بس مفيش نص ساعة موبايل بتاعة بكرة؟ ولا نمشي دلوقتي وتقعد ساعة على الموبايل ونيجي النادي بدري المرة الجاية؟)
المطلوب تخليه يختار اختيارك ويفتكر إنه هو اللي أخد القرار
٣- في غير وقت الخلاف امدحه في كل وقت بيسمع كلامك من غير رفض.. قول شكرا يا فلان انك عملت كذا زي ما طلبت منك واديله بوسة.. حضن.. مسحة على الكتف أو شئ في احتكاك جسدي. ( المدح بيزود احتمالية تكرار السلوك الإيجابي)
٤- قول حاضر كتير كأب وأم وبلاش نستخدم كلمة لا.. معظم الأطفال اللي بتقول لأ كتير بتكون هي إللي بتسمع لأ كتير.. ممكن نستخدم كلمات تانية للرفض زي.. حاضر بس بعدين.. حاسب.. بس.. stop.. oh oh.. oops.. yuk.. خد بالك.. كده غلط..
وهكذا مهم تنوع أسلوب الرفض والنهي عشان مايستخدمهوش ضدك..
٥- الأطفال الصغيرة أوي نستخدم معاها الإلهاء لو لسة مابتفهمش الكلام.. لعبة بتحبها.. أغنية بتجذبها.. صوت مبهج..
٦- ممكن مرة تمثل( كده وكده) وتطلب طلب إنت متأكد إنه هيرفضه.. مثلا لسة جايب لعبة جديدة فتقوله مش هينفع نلعب بيها غير بعد يومين.. ده طلب وهمي طبعا..هو هيرفض ويطنطط ويترجى.. فانت بسهولة تقوله حاضر.. وتسمع كلامه وتقوله أنا بسمع كلامك عشان بحبك .. كرر ده كذا مرة في الأسبوع.. الهدف نبني السلوك التوافقي ونجعله عادة.
يبقى الملخص:
١- اسمع باهتمام
٢- خلي قرارك في صورة اختيار أو اتفاق مسبق
٣- اديله بدائل جذابة أو الإلهاء للسن الأصغر
٤- امدح السلوك الإيجابي لما يحصل في وقت وغير. وقت الخلاف.
٥- بطل تقول لأ وماتعندش معاه .. وماتحاولش تفرض سيطرتك.. خلي طلبك بصوت هادي وابتسامة
٦- استخدم ال role play
كذا مرة في الأسبوع وتكون فيها انت اللي بتوافق على طلبه.. فيحس إنه عايز يقلدك ومايربطش الطاعة بالضعف.. يربطها بالحب.
السلوك السلبي عشان يتعدل محتاج وقت.. الصبر مفتاح التربية.
مرحباً بالتعليقات الجديدة .