البساط أحمدى

البساط أحمدى

بقلم/  هيثم كمال
رأس السنة

حكاية راس السنة دى حكاية مصرية ، والمصريين الموضوع ده كان عندهم كبير جداً ، كل عام وانتم بكل الخير ، ويارب سنة سعيدة على الدنيا كلها ، الكلمة دى بنقولها على طول وفى كل مناسبة ( كل عام وأنتم بخير) ، أول ناس عرفوا الكلمة دى المصريين ، كلمة (عام أو سنة) ، من 6258 سنة أُعلن التوقيت أو التقويم الفرعونى ، كان 12 شهر وكل شهر 30 يوم ، تبقى السنة 360 يوم ، تكمل ب 5 ايام أو 6 ، فتبقى السنة اللى عارفينها لحد دلوقتى  السنة الشمسية ، الشهور هي : توت وبابه وهاتور وكيهك وطوبا وأمشير وبرمهات وبرمودة وبشنس وبؤونة وأبيب ومسري ، اللى وضع التقويم ده العلامة توت أو تحوت اللى اخترع الكتابة ، علشان كده بدأوا شهور السنة باسمه توت ، بس أول ايام السنة الفرعونية كان يوم 11 سبتمبر بالتقويم الجريجونى ، المصريين كانوا بيسمّوا اليوم ده (نى – يارو) يعنى (يوم الانهار) وهو يوم اكتمال فيضان نهر النيل واتحرّف الاسم الى نيروز ، ودا عيد أول أيام السنة الزراعية الجديدة ، التقويم ده فضل معمول بيه 4000 سنة واتعدل سنة 238 قبل الميلاد علشان يثبتوا أول يوم ف السنة يوم 11 سبتمبر ، التعديل ده كان باضافة يوم كل 4 سنوات ، اللي هو  السنة البسيطة والكبيسة  ، التقويم الفرعوني كان اسمه العام التحوتى ، طيب احنا قلنا إن التقويم التحوتى المقدس العام كان 360 يوم ويكملوه ب5 أو 6 ايام ، الأيام دى كانوا بيسموها النسئ ، يعنى الأيام المنسية من العام ، ودى كانت أيام الاحتفال برأس السنة ، ودا أول احتفال عرفته البشرية وأول احتفال لأول مجتمع متحضر على وجه الأرض ، طيب إزاي المصريين كانوا بيحتفلوا براس السنة الفرعونية ؟  أول حاجة (الكحك والفطاير) ، كنت حكيت لكم على البساط إن الكحك والنقوش اللي عليه وحتى المنقاش اللي بننقش بيه كحك العيد اختراع مصري ، نرجع للاحتفال برأس السنة ، المصريين كلهم بيخرجوا للحدائق والغيطان سايبين وراهم هموم سنة بحالها ، كانوا بيقضّوا الايام الخمسة كلها برّة البيوت ، أول يوم ياخدوا فطاير الرحمة فى الاسبتة ويطلعوا المقابر -(طلعة القرافة) - ماعرفش ليه بيسموها القرافة ، لازم أول يوم يزوروا اللي رحلوا عنهم ويحيوا ذكراهم ، لأن المصريين أول من آمن بالبعث ، عرفتوا ليه المصريين بيطلعوا بقرص الرحمة القرافة يوم العيد ، اللهم ارحم موتانا جميعاً ، بعد كده بقية الايام حفلات موسيقى ورقص وألعاب ومسابقات ، حاجة كده شبه الليلة الكبيرة بتاعة عمنا صلاح جاهين ، مش باقول لكم المصريين دول مالهومش حل ، ولأن ده كان أهم عيد عند المصريين فكانوا لازم يحتفلوا بأطيب أنواع الأكل ، بط أو وز ويشووه فى الغيطان ، مش بيفكركم الموضوع ده بالديك الرومى وعيد الشكر عند الامريكان ، وكانوا كمان بياكلوا الأسماك المجففة ، مش دى برضه (البكالاه) اللي كان لازم تتاكل فى الاعياد بس اختفت دلوقتى ، أما المشروب المفضل كان عصير العنب الطازة ، واخدين بالكم الطازة مش المتخمّر ، وبرضه زى العادات اللي لسّه بنعملها فى مصر  ، حفلات الزفاف بتبقى فى الاعياد ، كانت حفلات الزفاف تتم فى عيد رأس السنة ، علشان تبقى بداية العام الجديد بداية لحياة زوجية  سعيدة ، بس أهم حاجة كانوا المصريين بيعملوها فى الأيام المنسية قبل ما يبدأوا عامهم الجديد ،.. إنهم ينسوا خلافاتهم وزعلهم من بعض وخصامهم ، فكانوا يقيموا مجالس الصلح بين المتخاصمين ويحلوا المشاكل بالود والسماح ، ودي كانت من مظاهر تديُّن المصري القديم ، كان لازم يبدأ العام الجديد بنفس صافية وبمودة لكل البشر ، كان المصري بيتسابق لزيارة اللي مخاصمه أو اللي بينه وبينه عداوة وهوا شايل الكحك المنقوش ، ويقسم الكحكة مع اللى رايح يصالحه ، دليل على الود ونسيان اللي اللى فات ، عارفين كتاب الموتى عند الفراعنة مكتوب فيه إيه ؟ مكتوب (إن الخير أقوى من الشر والمحبة تطرد العداء ) .. الله الله .
ياترى لسه حابّين نبتدى سنة جديدة بتصفية نفوسنا من كل الضغينة اللي ممكن تكون سابتها لنا أيام سنة فاتت ؟ ، اقول لكم على وصفة مضمونة ، صلي ركعتين لله وشوف الصفا اللي هيملا قلبك ، مش سيدنا رسول الله عليه أفضل الصلاة والسلام قال : (أرحنا بها يابلال) ، نرجع لطقوس المصريين فى الاحتفال برأس السنة ، صادف لما اتولت كليوباترا عرش مصر كان مع احتفال عيد رأس السنة فابتدعت كرنفال الزهور  ، ولحد دلوقتى بنشوف كرنفالات الزهور والعربيات المتزينة بالورود فى اعياد كتيرة ، بس مش فى راس السنة ، أنا ليا حكايات مع راس السنة ، إتعودنا فى الجامعة على رحلة أيام 30 و31 ديسمبر وأول يناير للاسكندرية ، اجمل وقت تروح فيه الاسكندرية فى الشتا ، وكنت احب انزل عند اصدقائى ايمن واكرم اسماعيل وكانوا ساكنين فى كليوبترا ، فكنت ارجع بعد الساعة 12 من محطة الرمل لغاية كليوبترا مشي ، بس كنت بامشى على شريط الترمواي بين القضبان ، لأن الاسكندارنية بيحتفلوا برمى أي حاجة ساعة رأس السنة ، أعتقد انهم خدوا العادة دى من اليونانيين الجريج اللى استوطنوا الاسكندرية ، المشي بيت القضبان بيحميك من وصول المقذوفات السكندرية ، كانت أيام جميلة ماتتنسيش ، أما الحكاية التانية .. فكانت من اكتر من 20 سنة ، كنت بأقدم برنامج البساط السحرى على شاشة القناة الاولى فى التليفزيون المصرى ، وصادف انه كان بعد الضهر يوم 31 ديسمبر وفاضل ساعات على راس السنة ، ولأن البرنامج كان بيبقى رحلة فى الزمان والمكان والانسان ، وكل مرة ف بلد ، سألت نفسى سؤال : هو فيه حاجة اسمها رأس السنة ؟ ، الزمن متصل ولا يتوقف إلّا لما يرث الله الأرض وما عليها ومن عليها ، وحتى لو التقاويم اتعملت علشان نحسب أوقات الأحداث ، أونعرف مواعيد الزراعة زى تقويمنا التحوتى الفرعونى ، إلا إنه رأس السنة مش واحدة! ، كل بلد ليها ميعاد لرأس السنة ، ياترى تعرفوا أول بلد بتحتفل براس السنة ؟ ، أقول لكم ، فرصة أرجع بيكم على البساط السحرى من على البساط الأحمدى ، أول بلد اسمها (جمهورية كيريباتى) ، دى سلسلة من الجزر فى المحيط الهادى الاوسط الاستوائى ، 32 جزيرة مرجانية بتقع على تقاطع خط الاستواء وخط التاريخ الدولى ، دا أول خط من خطوط الطول اللي بتحدد توقيت كل دولة ، على فكرة كريباتى دا النطق المحلي لكلمة (جيلبرت) ، أما آخر بلد بتحتفل براس السنة (هاواى) ، وهى برضه ارخبيل - يعنى مجموعة جزر - 19 جزيرة ، وبرضه فى المحيط الهادى ، وطبعا زى ما انتم عارفين هاواي ولاية أمريكية
وهاقول لكم زى ما كنت باختم برنامج البساط السحرى : وقبل أن يرتد طرفك عدنا الى البساط الأحمدى على راديو مصر  فى القاهرة عاصمة مصر ، احلى بلاد الدنيا
سنة سعيدة عليكم
وكل عام وانتم بكل الخير.