بقلم/شيرين علي
بشوف حاليا حالات كتيره جدا للزواج الثانى والسبب العلاقه الحميميه بين الرجل والست
تلاقي الراجل مابيشتكيش من مراته ابدا وبيقول عنها أشعار ست بيت ممتاز ومهتمه جدا بالولاد والبيت والأكل والغسيل والتنضيف ولما أكون محتاجها تشتكي أنها تعبانه ومجهده من أعباء البيت
طب ماتيجي وبأختصار نوضح يوم الست المصريه......
يوم الست المصريه يبتدي من الساعه ٦ الصبح
تحضير الفطار وعمل السندوتشات للولاد
والأطمئنان على نزولهم للمدرسه وفيه أمهات بتودى بنفسها المدرسه
ترجع تبتدى تنضيف فى البيت والغسيل وعمل الغداء للولاد وغسيل المواعين
الولاد يرجعوا من المدرسه يبهدلوا اللى تعبت فيه طول اليوم تحط الغداء ترجع تانى تغسل المواعين تدخل بعد كده على مذاكره الولاد وطلباتهم وتزعق وتتخانق علشان يسمعوا كلامها وطول اليوم صوتها مسموع للجيران
تنزل تشتري الفينو والطلبات اللى ناقصه عقبال ما ترجع جوزها يكون وصل من شغله
تبتدى تحضر فى الأكل وتشوف طلبات جوزها
وبعدين ترجع تغسل مواعين تانى
وتبتدى تهيئ الجو علشان الولاد يناموا تكون الساعه وصلت ل ١٠ و ١١ بالليل
يناموا الولاد من هنا طلبات الزوج من الناحيه التانيه حقه والله ماحدش قال حاجه وشرع ربنا وكل حاجه بس سؤال هو جزاء الست دى المهتمه بالبيت والولاد وطلبات الزوج أولا أنه يتجوز عليها ؟؟؟
طب ليه هى ما فكرتش أنها تتطلق مثلا من كتر المسئوليه والضغوط اللى عليها
دا حقك وشرع ربنا بدل ما تعمل حاجه غلط عارفين والله عزيزي الرجل كل الكلام دا بس هى أنسانه بنآدمه لحم ودم
ساعدها اقف معاها مش تجري تتجوز عليها
اتجوز عليها لو شخصيتها صعبه أو أم غير مسئوله
عندها جحود و أنانيه
لكن علشان الموضوع دا حاول توفرلها الراحه ولو مره واحده تيجي على نفسك شويه علشانها وعلشان راحتها خرجها فسحها قولها كلام زى زمان زى أيام الخطوبه
بلاش نهد البيت بسبب موضوع العلاقه اللى الكل معلق عليه شماعه الفشل
ونتجوز تانى ونظلم تانى علشان مش عارفين نعدل ولا عارفين نصرف ونشوف طلبات البيت التانى وكل الشقاء والتعب بيكون للزوجه الأولى والولاد طب والتانيه ايه ذنبها أنها ضحت علشان البيت الأولانى يعيش ياريت نتقي ربنا ونفكر كويس قبل ما نظلم حد والأهم من كده انك هتظلم نفسك
ارجوا عدم التسرع فى اتخاذ القرارات
مع تمنياتى للجميع بسعاده وراحه بال ورضا تحياتى اليكم
مرحباً بالتعليقات الجديدة .