صعب تلاقي حد يخاف عليك
بقلم - نهي نصر
صعب تلاقي حد بجد يخاف عليك
وصعب تلاقي حد يفهمك من عينيك
حد من غير ما تتكلم هو يحس بيك
لو لاقيته تعمل ايه ؟
كأنه بيجراله كل اللي بيجرى ليك
والألم اللي هو فيه هو الألم اللي فيك
واللي بيوجعه نفس اللي بيوجعك ويأثر فيك
لو لاقيته تعمل ايه؟
انسان لو مهما يحصل عمره ما يفرط فيك
يتحدى الدنيا عشانك عشان نظرة من عينيك
يتحدى كل الناس عشان يفضل دايما حواليك
تعيش طاير من السعادة بفضل حنانه عليك
لو لاقيته تعمل ايه؟
شخص بتسمع كلامه عشان بتحبه
وعشان بيحبك , كلامه بيمشي عليك
انسان يعملك كل اللي تطلبه مش عشان واجب عليه
لكن علشان خاطر عينيك
لو لاقيته تعمل ايه؟
انسان نفسه يفرحك وكأنه ملك ايديك
انسان لو تتوجع قلبه بيسمي عليك
ولو في يوم يبعد عنك غصب عنه بيناديك
ولو فارقك في يوم , ما يلحقش ويرجع ليك
لو لاقيته تعمل ايه؟
انسان طول ما انت بتحبه هو واهب نفسه ليك
انسان مهما تغيب عنه قلبه اتقفل عليك
شخص مهما يشوف في حياته عمره ما يرضى الا بيك
يعني مهما يقابل من ناس ما يرضاش بديل ليك
انسان يونسك وبرده بيتونس بيك
لو لاقيته تعمل ايه؟
شخص يبيع الدنيا بحالها ويشتريك
عمره ما يتخلى عنك مهما اتغير الحال عليك
انسان بيحبك بعيوبك بميزاتك بكل اللي فيك
لو لاقيته تعمل ايه؟
شخص بيكملك وتكمله وما يقدرش يعيش الا بيك
انسان انت منه وهو منك وقد ما بياخد منك بيديك
لو لاقيته تعمل ايه؟
اقولك تعمل ايه
بسرعة اجري عليه
واوعى تضيعه
ولو سيبته يضيع منك يبقى
حقك عليك
___________
هو في حد كدة ؟
................
رئيس قسم الادب والشعر : نهي نصر
