كلنا بنحب يكون شكلنا حلو و شيك و يبقى شكلنا اصغر من سننا الحقيقى .. أي ست كده تحب اللي يشوفها يقولها إيه الجمال ده و الشياكة دى .. مع بعض هنعرف شوية أخطاء بنعملها و لازم نبطلها فورا"
اللون الأسود هو ملك الألوان لا غبار عليه طبعا" لكن حضرتك لما تحبى تلبسي اللون الاسود و عايزة الطقم كله اسود خدى بالك انتى مش راحه عزا لاء لازم تكسري السواد ده بأكسسورات مثلا لونها احمر او فيروزى او اى لون بتحبيه و حزام دهبي او اي حزام لون مختلف و طبعا متلبسيش الشوز اسود كمان كده اوفر صراحة لاء إلبسي لون مختلف عشان تكسري من اللون الأسود و تبانى اجمل و أحلي و أصغر و طبعا الشنطة لونها يبقى ماشي مع لون الشوز او العقد و الأكسسوارات
بتحبي اللون البنى و انا كمان بحبه بس خلاص غيرت و بقيت أحب ألبس الوان مبهجة و ألوان تخلينى أحلي . اللون البنى بيخلينا اكبر فالسن و يخليكى تشعري بالكأبة و احنا مش عايزين كده لاء عايزاكى تحبى نفسك و تبقى سعيدة ممكن تلبسي بنى بس مع شوية تعديلات يعنى مثلا إلبسي اللون البنى جاكيت شوز شنطة مع جينز ازرق مع اسكارف اصفر او زيتى لكن متلبسيش كل الطقم لونه بنى و بلاش البنى الغامق خليكى فالدرجات الفاتحة هتديكى جمال و حيوية
جسمك مليان شوية او شويتين متزعليش و لا تضايقى نفسك هقولك علي طريقة تلبسي إيه عشان تبقى واثقة فى نفسك و مبسوطة اولا بلاش تلبسي فساتين و بلوزات واسعة عشان تقولي هداري بيها عيوب جسمى لاء بالعكس انتى كده بتزودى حجم جسمك فبتبانى اتخن و كمان متلبسيش الضيق قوى كده هتبينى فعلا جسمك شكله وحش البسي المقاس المناسب ليكى و اللي يداري عيوب جسمك . و كمان إيه متلبسيش القماش اللي فى زخرفه و ورود و شغل كتير ده هو طبعا شكله حلو لكن مش لجسمك لان الأشكال دى بتدى حجم اكبر .. كمان متلبسيش الأقمشة اللي فيها خطوط بالعرض اكيد فهمتى هقول ايه هتعرض معاكى الحجم إلبسي اللي بالطول هيفرق فشكل جسمك
بحب قوى لبس البليز بيمشي كلجوال و كلاسيك و كمان بيداري عيوب الجسم يعنى لو مليانه من عند البطن إلبسي بلوزة و عليها جاكيت هتلاقي شكلك حلو و شيك علي بنطلون أو اسكريت بس مش واسعة و لا قصيرة ممكن تكون علي مقاسك و نازلة علي الجسم او مع بنطلون جينز او كلاسيك او بالجاكيت مع فستان .
طبعا الكلام عن الموضة و الفاشون مش بيخلص لكن كل يوم نقول معلومة جديده
#أنتى _أستايلسيت_شخصيتك
مرحباً بالتعليقات الجديدة .