من هي الروائية مارينا ؟
مارينا جورج , 25 سنة, خريجة تجارة اسكندرية و عملت دبلومة موارد بشرية في الأكاديمية العربية و بشتغل حاليا في مجال الموارد البشرية
رحلتي بدأت مع الكتابة سنة 2012 لما حد قرا مذكراتي بالصدفة و عرض عليا أكتب مقالات في مجلة شبابية , بالفعل تم نشر حوالي 4 مقالات فيها و مقالة تانية في مجلة "تخاريف" , لحد ما عملت المدونة بتاعتي و بقيت بكتب فيها و بشارك دة مع أصدقائي عالفيسبوك و اللي كنت بلاقي تفاعل كبير منهم علي كتاباتي
لحد ديسمبر 2015 لما جاتلي فكرة الرواية , الفكرة جاتلي لما زورت مستشفي 57357 في نوفمبر , أيقنت ساعتها أن الألم هو الشيء الوحيد اللي يستحق انه يتكتب عنه .
في الفترة الأخيرة تطورت حركة الابداع النسائي في عالمنا العربي من أسماء كان لها أثر الكبر في حب مارينا للكتابة ؟
لو هنتكلم عن حركة الابداع النسائي في الفترة الأخيرة فلابد أن نذكر العبقرية مريم نعوم اللي ناقشت القضايا النسائية بشكل درامي مختلف و واقعي جدا و حولت رواية ذات لقطعة درامية نادرة من نوعها
ظهر مؤخرا امرأة اسمها "أنيسة حسونة" هي عضوة في البرلمان و محاربة سرطان وقريب جدا هتنزل كتاب عن قصتها في محاربة السرطان , هي من الناس المهمة اللي ألهمتني خصوصا ان كتابها هيبقي في نفس سياق الموضوع اللي نفسي أكتب فيه .
ما هي أسباب القضايا التي تشغل بال الروائية مارينا في الوقت الحاضر ؟
من أكثر القضايا اللي شاغلاني في الوقت الحالي هو "الألم" أو طريقة مواجهة الألم اللي بتتفاوت من شخص للتاني , اللي شاغلني أكتر هو طريقة مواجهة الألم النفسي و المعنوي أكثر من الألم الجسدي عشان كدة اخترت مرض سرطان الثدي خصوصا عشان يبقي موضوع روايتي لأن الألم المعنوي من نوع السرطان دة بالذات بيبقي اقوي علي الست من أي ألم جسدي محسوس
هل مررت يوما ما بحالة شعرت فيها أن شخصياتك غير مطواعة و تتحرك بغير انضباط بعيدا عن قدرتك علي التحكم فيها ؟
كتير جدا حسيت دة بالذات و أنا بحرك الشخصيات تجاه أفعال معينة , مثلا في أفعال معينة مينفعش يبقي ليها نفس رد الفعل مني أنا ك (مارينا) و من الشخصية اللي بكتبها , دة لأنها بتبقي وصلت لدرجة كبيرة من الواقعية اللي بتخليها ترفض تعمل حاجات معينة تلقائيا من غير تحكمي ك كاتبة فيها . .
لابد من سؤال لا يمكن في العادة تجاوزه , ما هي عادتك الكتابية ؟
يمكن أنا غريبة شوية في طبعي , لكن أنا دايما بحب أكتب و انا قاعدة عالبحر و و أنا ورقي كله حواليا , بحب أعمل ملف لكل شخصية اسرد فيه صفاتها الشخصية العميقة جدا ( عصبية و هادية , مرحة..) عشان أقدر أتوقع ردود أفعالها و كلامها و اللي بيدور جواها وانا بكتب .
يقول ماركيز "أنا أكتب حتي يحبوني الناس و أكسب الكثير من الأصدقاء" لماذا تكتبين ؟
بكتب لأني بتبسط لما بقرا كلامي بعد كدة و أحيانا بيتحول الانبساط دة لدموع فرحة لو أنا كاتبة حاجة حلوة , أحيانا بكتب عشان ببقي نفسي أوصل احساسي لحد و مش بلاقي حد يسمع و ساعات بلاقي ناس تسمع بس محدش بيتفاعل أو بيحس بيا بنفس الدرجة اللي بكون متوقعاها ف بكتب عشان أشارك أكبر عدد من عقول و مشاعر الناس اللي ممكن تسمع أو تتفاعل أو تحس .
كلمة أخيرة لجمهورك اللي بيتابعك ؟
انا مش حابه اوي اني اقول علي اللي بيتابعوني جمهور لاني محتاجة انهم يقرولي عشان اوقات كتير الانسان بيبقي مستني حد يسمعله و الناس اللي بتقرالي بالظبط زي الانسان اللي بيتوجد لي مره واحده و يسمعني و انا بفضفض, شكرا عالوقت اللي أخدتوه و انتوا بتقرولي أي حاجة أنا كتبتها و شكرا للناس اللي شجعتني و قالتلي انتي بتعرفي تكتبي , بسببكم أنا بكتب أول رواية ليا
رجاء أخير : لو أي حد حابب يشاركني بقصص واقعية عن المرض أو أي شئ علي سبيل الفضفضة أنا موجودة و لينك الأكونت بتاعي :
https://www.facebook.com/marina.georges.5
مرحباً بالتعليقات الجديدة .