رحيمة الشريف : حلمي هو وزارة للحرف اليدوية
اعداد و حوار / مصطفى العطار
ولاء حسين :
" بسبب مبادرة الست المصرية اتحولت من ست بيت لسيدة مجتمع في سنة "
" قبل انتمائي لمبادرة الست المصرية كنت محبطة للغاية "
" في مصر التعليم حاجه و الحياة العملية حاجه تاني خالص "
" باحلم بعمل مصنع و براند خاص بي "
رحيمة الشريف :
" باحلم بوزارة للحرف اليدوية "
" انا لا ابحث عن أيدي عاملة انا ابحث عن أيدي عن أيدي مبدعة و حالمة "
"لا اتعامل مع الكيانات الكرتونية أصحاب اللقطة و سرقة مجهود الغير ''
" احلم بتحويل اطفال الشوارع من قنبلة موقوتة الى ذخيرة للوطن ''
و لاء حسين هى مصممة هاند ميد من طراز نادر متخصصه في المنتجات الجلدية صعيدية الأصل قاهرية النشأة حاصلة علي بكالوريوس تجارة جامعة عين شمس . خريجة مدرسة رحيمة الشريف سيدة الاعمال و مؤسسة مبادرة الست المصرية و التي انطلقت منذ عام لتجوب كل مدن مصر دعما للابداع و بحثا عن تدريب الايدي المبدعه .
في البداية حدثينا عن نشأتك و عن حلم طفولتك ؟
كتت باحلم ابقى مذيعه ولكن مجموعى دخلنى كلية تجاره عين شمس
او اتجوزت وانا صغيرة زى كتير من بنات مصر .
و انا نشأت في حي المطريه بالقاهره و احنا عائله معروفه جدا
لكن انا في الأساس صعيدية الاصل و افتخر جدا اني من الصعيد حيث العادات و التقاليد
قبل ما تعملي في مجال الهاند ميد اشتغلتي ايه ؟
اشتغلت ربة منزل و اهتميت بزوجي و بيتي و اولادي
من اين جاءت لكي فكرة الهاند ميد ؟
بناتى كبروا وانا قاعده فى البيت مش باعمل حاجه
فكرت اشغل وقتي واعمل حاجه اشغل نفسى بيها
فكرت اتعلم تفصيل لقيت نفسى انه مش خطى ولا ميولى
و من خلال السوشيال ميديا بدأت أبحث على كورسات
و قابلت بالصدفة مبادرة الست المصرية و مؤسستها سيدة الأعمال رحيمة الشريف
وجدت انه اكتر مكان بيعلم السيدات بأرخص الاسعار
فقلت اجرب مش هاخسر حاجه خصوصا ان الكورس سعره معقول و في متناول الجميع
و خوضت تجربة التفصيل لتاني مره ولقيت اني غير مندمجه مع هذه المهنه
شجعتني السيدة رحيمة على تعلم شيء اخر خصوصا انى كنت محبطة للغاية
و لقيت ان كورس تصميم الجلود هيبدأ و بالفعل حبيت الجلد جدا و نشأت بينا علاقه خاصة تقدر توصفها بالعشق
و اخدت كورس المبتدأين تحت اشراف المدربه دنيا نظمي ثم كورس المحترفين برعاية مستر اسلام اللي بنلقبه بالاسطوره لانه ماهرجدا في عمله .
ماهي ضربة البداية في حياتك المهنية ؟
ضربة البداية بالنسبه لي هي مبادرة الست المصرية و رحيمة الشريف و كورس الجلود
و بالفعل كانت بداية موفقه جدا خاصة ان رحيمة انسانه جدا
مافيش ست بتدخل عندها الا لما بتعتبرها اختها وبنتها وامها وسيدات المبادره بيعتبروها بيتهم التانى
وبيبقى عندهم انتماء جامد جدا للمبادره وبيعملوا علاقات جديده الموضوع مابينتهيش بالكورس
دا بيمتد بصداقه محترمه بتفضل وتكبر
وبيتحول لبيزنس وشغل وكاريير
ودا اللى حصل معايا بالظبط
اتحولت من ست بيت لسيدة مجتمع
علاقتك بالمبادرة و رحيمه من امتى ؟
من اول يوم ليا فى المبادره و تقريبا من سنه
انا دلوقتى حساها اختى او بنتى رغم ان سننا واحد بس من كتر انسانيتها
بتحسها اختك وبنتك وصاحبتك و المبادرة ليها فروع كتير و رحيمة بتتعب جدا و بتلف محافظات مصر كلها
لكن مقرها الاساسى في مصر الجديده
كلمينا عن كيفية التدريب في كورس الجلود ...
المبتدئين بيتعرفوا على الجلد وانواعه واماكن الشراء بتاعتها وتقنياته و معداته ومبادئ الشغل عليه
وطريقة الشغل 6 حصص في خلال شهر كل حصة ٣ ساعات
و من كتر عشقنا للجلد ضغطنا على رحيمه تعمل لنا كورس ناخد فيه تقنيات اكتر
الدق و الحفر بيحتاج مجهود كتير و بيحتاج كورس لوحده
مدة كورس المحترفين ايضا
٦ حصص في خلال شهر كل حصة 3 ساعات و بادين بالفضل للمدربين دنيا نظمي و مستر اسلام الاسطوره
من اكثر الاشخاص اللي دعموكي و ساندوكي خلال رحلتك مع الهاند ميد ؟
دعمني زوجي بقوه و بناتي و طبعا رحيمة اللي بقت من اهم اصدقائي مع الوقت
ما هو حلمك الشخصي في مهنة تصميم الجلود ؟
اعمل مصنع ويبقى لى براند خاص بيا
واشغل سيدات كتير جدا واساعدهم واعلمهم ...
بماذا تطالبي المسئولين بوجه عام ؟
بطالب بانشاء وزارة للحرف اليدوية و أن رحيمة الشريف تكون أول وزيرة لهذه الوزارة لما تملكه من الخبرة و النشاط و الحماس و الأفكار الجديدة خارج الصندوق ...
ماهى المعوقات التي قابلتك
في مهنه الهاند ميد و التسويق لها ؟
الجلد غالى والادوات كلها بتيجى من بره بسعر الدولار
رغم انه سهل تتصنع في مصر و ابتسمت قائلة " انها مش كيميا " ...
اخيرا رحيمة الشريف بتمثلك ايه ؟
رحيمة الشريف بتمثلك لي أيقونة من أيقونات الابداع و الانسانية معا ..
هذا وقد تواصلت مملكتي مع سيدة الأعمال رحيمة الشريف التي ذكرت :
انها قامت بتأسيس مبادرة الست المصرية و لها منهج خاص بها معتمد بوزارة الصناعه منذ عام تقريبا و التي تقوم بتدريب السيدات علي التفصيل و الخياطة و التطريز و تصنيع الجلود وتشكيلات المعادن مثل النحاس و " الديكوباج " هو تحويل قطع الأساس القديمه الي قطع أثاث جديدة بشكل أكثر حداثة و بشكل فني يمكن استعمالها و اقتنائها وهذا الفن فرنسي الأصل نشأ في القرن ال19 . و انها تقوم بزيارات كثيرة لسوق المستعمل و في القاهره و الاسكندرية و عدة مدن أخري للبحث عن قطع اساس قديمة و اعادة تدويرها .
و أضافت الشريف انها تقوم بمتابعة أعمال كل من قامت بتدريبهم و اعطائهن محاضرات مجانية عن التسعير و التسويق لتأهيهلن لسوق العمل و انها تهتم و تدرب و تستهدف المرأه المصرية من جميع الطبقات دون استثناء بدءا من الطبقة البسيطة محدودة الدخل و تسعى لتحسين دخلها انتهاءا بالطبقة الغنية الباحثة عن الابداع و الفن من اجل الابداع و الفن .....
و اضافت الشريف مستطرده :
" انها أيضا استهدفت الأطفال حتي سن 15 سنة لتعليمهم فن النجارة و انها لاحظت ان الأطفال أحسن من الكبار في حالات كثيرة من حيث الاستيعاب و التنفيذ و انها معجبة للغاية بمبادرة " أطفال بلا مأوى " تحت راية تحيا مصر و انها مستعدة لتعليم هؤلاء الأطفال مهن يدوية لتأهيلهم لسوق العمل و المساعدة في الاصلاح من شأنهم و انها تحلم بتحويل اطفال الشوارع إلى أيدي عاملة و منتجه من قنبلة موقوته الي وقود للوطن فالحرف اليدوية و المشروعات الصغيرة هى التي قامت عليها الحضارات القديمة و الحديثة من شرق العالم لغربه ولنا في الصين و اوروبا اسوة حسنة ..
و اختتمت رحيمة الشريف حديثها :
انها اصبح لديها 5ألاف سيدة متدربة و مؤهله لتصدير منتجات لكل الأسواق و ان أغلبهم قد خاض التجربة بالفعل من حيث شراء الخامات و بيع المنتج و ممارسة التجارة الفعلية و استهدفت حتى الأن عدة محافظات أهمها القاهره و الاسكندرية و كفر الشيخ و المنصورة و البحيرة و قريبا الشرقية و السويس و بورسعيد .
و انها تتعامل مع محافظ كل مدينة من المدن التي تقوم بزيارتها و التدريب فيها و تقدمت بالشكر للسيدة نادية عبده محافظة البحيرة لحسن تعاونها مع المبادرة و انها تري ان المرأة قادرة و تستطيع و ان تبدع ايضا بكونها وزيرة أو محافظ ..
مرحباً بالتعليقات الجديدة .