صداقه الأبناء من المشاكل الازليه اللي بتواجه كتير من الأسر وازدادت جدا اليومين دول لدرجه انها احيانا بتوصل ببعض الأبناء الي عداء مع والديهم لانهم مش عارفين يتواصلوا او لان لغه الحوار بينهم مقطوعه من الصغر وعلشان نكسب صداقه ابناءنا ونتجنب مشاكلهم علينا من البدايه بالآتي :
* الاحترام
-------
- احترم رأيه وانصت جيدا لما يقول واعطيه مساحه ووقت يتكلم و لو مش منتبه معاك دخله في الموضوع واطلب رأيه وناقشه فيه وحسسه أن قال راي مهم واشعره انك حتاخد برأيه .
- احترم ملكيته وخصوصياته وما تحاولش انك تقلل من قيمة ما يملك ،،،، انا يفتكر ابني الأوسط وهو صغير لما كان يمشي في الشقه ويجمع اي حاجه ولو صغيره جدا ويحطها في كيس وكان يحط الكيس ده تحت المخده وهو نايم وأول ما يقوم من النوم اول حاجه يتفقدها الكيس وكان هو رفيقه طول اليوم ولما كنت اشوف الحاجات اللي جواه" ده طبعا وهو نايم لانك مش ممكن كنت تقدر تمد ايدك ع الكيس وهو صاحي ابدا 😂 " كنت الاقيها من وجهه نظري لا تستحق علي الاطلاق لكنها كانت كل حياته .
- احترمه قدام اصدقائه ومدرسيه واعطيه قيمه أمام الجميع وبلاش تغلطه أو تنتهره بكلمه جارحه قدامهم لكن ممكن بنظره عين تحسسه بخطأه وتحاول تخلي شكله حلو قدامهم وبعدين بينك وبينه عرفه خطأه.
*وسع صدرك
---------------
سعة الصدر بتظهر لما توسع قلبك لاسئلته وتجاوب عليها أو تعتذر انك ما عندكش اجابه حاليه ولما تطول اناتك عليه في وقت غضبه ، ولما عقابك يكون برحمه وحب مش انتقام وكأنه عدوك .
* لا تغيظوا أولادكم لا بالكلام ولا بالتصرفات ولو حسيت أن في حاجه بتغيظه ما تكررهاش ولو من باب الهزار .
* كبر ابنك وخليه يواجه مشاكله بنفسه وأكد له إنك جنبه مش حتسيبه" اوعي تقوله وريني شطارتك علشان تبقي تسمع الكلام من الاول " ما هو لازم هو كمان يكون خبراته الخاصه مش كل حاجه حتسقيها له بالمعلقه ، وبكده تكون دربته علي التفكير إلي أن يصل للتفكير السليم مع الوقت والسن .
* الصداقه دي بتبدأ من الطفوله ، اوعي تسيبه لما يبقي أصحابه هم كل دنيته وهم الصدر الحنون اللي بيسمعه ولما يكبر تدور عليه لانك ساعتها للاسف مش هتلاقيه .
ربنا يوفقنا جميعا في صداقة أولادنا اللي هي فعلا اجمل صداقه واصدقها
مرحباً بالتعليقات الجديدة .