بقلم نهى نصر
بقينا بالغيرة عايشين
بالغيرة بقت الناس ماشية
ليه تبقى عندك حاجة مش عندي
لازم اجيبها ان شالله بالعافية
حتى لو كلامك بيعجب الخلايق
ها اتكلم زيه ولو عليا مش لايق
بتخربها وتجيب عليها واطيها
لو بوتاجازها مش زي جارتها اللي جنبيها
يا اما تطلقني وتاخد العيال
يا شقتنا تبقى احسن من شقة اخوك .. اومال
أعيش ازاي من غير النيش؟
بالمنظرة والبهرجة ما نقدرش نعيش
بتحب تقرا على فكرة وانا كمان
تعالى شوف عندي كام كتاب وكتاب
كريم في بيتك , انا زيك بردو
ده ياما بيجيلي قرايب وصحاب
حلوة ضحكتك , ما انا بضحك زيها
لو عندك حاجة حلوة , عندي احلى منها
وزي ما نكون داخلين في منافسة
وزي ما يكون عايشين في حرب
اتملت الدنيا حقد وغيرة
وقلوب مش مرتاحة , استر يارب
