فرشت القلب
بقلم- وفاء عبد الله
فرشت القلب
.. ريحان وورود
وزفيت الأمل جواه...
ولو حزني.. ناويلي يسود
فأنا بايعاه ومش شارياه
أنا شاريه دموعي الغالية مش بايعة
فأنا بعلن أكون ساعية...
لمحو سجل أحزاني ..
أنا بعلن يا روح إني ..
معشتش لحظة أنا ف سني ..
وشلتي معايا ياما كتير
وجه دوري اوفي الحق
وارجع حق كان ضايع
وفاقد لذة التقدير...
وم واقع وعيشته مرير
وقلب تملي بيردد
"انا رافض ومش قابل
أنا والجرح نتقابل "
هوفي الحق واسدد
ونية خير هتجدد
بصلح الروح ..
وحلم يفوق عن المسموح..
أنا قادرة..
أحطم خوفي جوايا
وأبني سد م القوى
بيروي الورد م جوا ..
ويجني أفراح..
أنا قلبي هيبقى براح
ماهوش حامل
بإنه بجد يتحامل
وجع وجراح...
أنا روحي دي شبه رياح
تهب شديدة وثواني..
بتمحي نواح...
مبتهزش ...
ولا عمري هكون قشة...
ولا قلبي يكونلي غريق..
أنا أقوى ... وأنا بأقوى
لا يمكن حتى ع سهوه
بإني اخضع لأي طريق
يضعف فيا مايقويش
أنا عصفور ماليه الريش
مش محبوس وحر طليق...
مبتهزش...
وشريان روحي لساه حي
ومتشعبط في بكرة الجي..
ع موعد...
بإن أيامي راح توعد
تقويني ماتضعفنيش
توفي بوعدها ماتخذلنيش..
ففرشت القليب بورود
ولو مكتوبلي إني اتهز
ف حياتي متلزمنيش
والله متلزمنيش
