بقلم :
يوسف الشرقاوي
دايما بنسمع ونقرأ عن الغربة
غربة وطن ناس بتهرب من وطنها وحياتها لوطن تاني
وحياة جديدة مع ناس غريبه عننا
يمكن يكون ده مفهوم الغربة عند معظمنا
لكن..
في غربة أصعب وهي غربة القلوب
ايوة القلوب اوطان
وكل واحد مننا ربنا مقدر له يعيش في اي وطن
لان ربنا بيألف القلوب بدون اسباب او سابق ميعاد
فلما تسكن وطن
او بمعني ادق لما تسكن قلب لازم تعرف ازاي انك تحافظ عليه وتهتم به
تدافع عنه من اي غريب يفكر يستعمره
بس الاهم انك انت مش تهاجر وتسيب وطنك
تسيب قلبك
مش تستغرب من كلامي
احنا كتير بنتغرب عن القلوب اللي بتحبنا
ونروح نلف وندور علي اوطان تانيه
او بمعني ادق بنستعمرها
ونسيب اوطانا نهجرها وندي فرصه لناس تانيه تستعمر قلوب احبابنا
طيب ليه ؟؟
وطنك محتاجك انت
محتاج رعايتك
محتاج تعمره بالحب والاهتمام
اهمالك له وانشغالك عنه غربه
تجاهلك لرأيه والتقليل من شخصيته غربه
شكك المستمر ومراقبتك له غربه
دي بعض اشكال غربه القلوب
لكن.....
لسه الفرصه موجوده
انك تبني جدار تحافظ به علي حياتك في وطنك
جدار من الاهتمام والمشاعر الجميله
متخليش الدنيا تاخدك بعيد وتنسيك وطنك
راجع نفسك وفكر ازاي تعيش وتموت جوه وطنك
صدقني لو اهملت وطنك هتعيش غريب طول عمرك
واكيد وطنك هيلاقي اللي يسكنه ويعمره ويحافظ عليه
ووقتها الندم مش هينفع لان الوقت هيكون فات
القلوب اوطان ومفاتحها الاهتمام والحب والموده
ولو مش هتقدر تسكن الوطن قصدي القلب اللي ربنا رزقك به يبقي احسن متدخلش من باب الوطن ده
وسيبه للانسان اللي يعرف قمته ويعرف يحافظ عليه
وخليك انت غريب او لاجئ في اوطان القلوب
مع تحياتي /يوسف الشرقاوي
