والدي العزيز
شعر / احمد الشمسي
والله اسف قوي..
عارف يا والدي خمس سنين من يوم ما رحت
وان السنة دي يادوب قدرت اني اكتبك
طاب اعمل ايه
الشعر مش بيطاوع المترددين
وكتابتي فيك تعني اقتناعي بأن موتك شئ حقيقي وااااااااه
ده موبايلي هنج مني وانا بكتب
وكأن قلبه بيوجعه
فازي حال صاحب الوجع؟؟
علي كل حال..
ازيك انت وعامل ايه
مبسوط اكيد
انا كنت عارف من زمان نفسك قوي ترتاح
اخواتي وامي كويسين
ومشتاقين.. وزعلانين
بقي تيجي لصحابك
وما نشوفكش ف اي حلم ولو ثواني
ازاي كدا
طاب ايوا ماشي انا ما استاهلش
طاب امي يعني ما وحشتكش
تبقاش تغيب
شوف يا والدي
الشيلة صعبة ونقص خبرة
مخلي نفسي اجيك قوام
وباتوه ف روحي من الزحام
ما بقتش اتابع حتي ماتشات التنس
ولكني احب اطمنك
( روجر ) بيلعب لسه وبيسحر كعادته
كمان (صباح فخري) بخير
لساه امير عرش الطرب
افتكره واترحم عليك
مارسيل خليفة كمان جميل
انا بس لسه منعزل
وبعيد عن الأخبار والساسة والتوك شو
عارف هتزعل مني وتقولي اطّلع
دي جامعة ايه اللي انت خريج منّها
بكفاية وقت تضيعه
انا باوعدك
كل الكلام ده هسمعه
معلش يعني رغيت كتير
اصلك واحشني كتير قوي
من يوم جسمك عني غاب
لكن خلاص بعد اقتناعي بانك انت مش هنا
انا هبدأ ابعت كل فترة ليك جواب
