الحلقة الثانية
فى أولادنا والمذاكرة
كتب د.أحمد جلال
==============
بعد ما تكلمنا عن النظام الاول هنتكلم النهارده عن
النظام الثانى
============
وبفكرك ان بعد ما نخلص الموضوع ده هنحدد يوم للرد على اى استفسار عندك او سؤال فى بوستات خاصة ان شاء الله بس الاهم تابعنا للأخر....
====================
قبل ما أبدأ رسالة بذكر بها الامهات التى بتبقى قاعده جنب ابنها علطول فى المذاكرة
(المخ لا يعمل تحت التهديد أو القسوة والعنف ... وإن الضرب والتهديد ورسائلك السلبية بتضعف الثقة والتركيز عند إبنك )
يعنى إن حضرتك تقعدى مع ابنك فى المذاكرة تزعقى وتضربى وتتعصبى وصوتك يبقى عالى
حضرتك تعبتى نفسك واتعكر مزاجك اليومى ..
وللاسف هو مش هيفهم ويستوعب كويس فى الجو ده تماما ... يبقى انتو الاتنين خسرتوا
===============================
تعالوا نتكلم بقى عن النظام الثانى
النظام التانى :(أتابع إبنى)
وهو ده النظام الصح
وده إن الام بتعود الطفل وهو فى (كى جى) على انها متقعدش جنبه تماما
وهى دورها تذكره بالواجب كل فتره و هو بيبدأ يقعد مع نفسه وهى عليها تشجعه وتابعه من حين لأخر زى مثلا
(ياله يا حبيبى بفكرك بالواجب ...أو.. الشاطر الرائع حبيبى هيكتب الحرف ده وأنا هروح أعمل كذا وأجيلك ولو لقيتك كاتب الحرف...تبقى شطور و ليك عندى حاجة حلوة .....إنت ممتاز وهتكتبه لوحدك )
فتروح تقضى مصلحة وكل شوية حتى ولو هياخد ساعتين فى الحرف (لان الطفل طبيعى بيتشتت بسهولة بأى مؤثر خارجى فينظر لأخوه شوية وللعصفورة شوية وللسقف شوية ...فمعلهش نتحمل لان دى طبيعته تركيزه بيتشتت من اقل حاجة )
مفيش مشكلة كل شوية تعدى عليه وتقولوا برافو محمد رائع جدا .... (مش مهم الوقت عندنا أد ما مهم يكتب الواجب ولوحده )ومن وقت للتانى الام بتابعه وبتسأله وبتشوف مستواه عامل إيه ولو لقيته ضعيف مثلا فى حاجة
بتتواصل مع المعلمه الاول وتشوف هتقدر هى تساعده فى ان يبقى قوى وشاطر فى الحته دى ولا لا ( يعنى بتعتمد على المعلمة الاول ولو المعلمة مجبتش نتيجه بتتدخل هى وتساعده فى انها تشرح له )...
ولو هو وقف فى حاجة ومش فاهمها قوليلوا ( طيب انت فاكر المعلمة قالت ايه فى الحتة دى وشجعيه علشان يقولك ..وافهمى منه الاول ايه المعلومات اللى اكتسبها من المعلمة وكملى عليها ولو تأكدتى انه مش فاكر حاجة خالص إبدئى وضحى له وسبيه يكمل كتابة او حل الواجب بنفسه ....)
حضرتك مش محتاج أقولك تخيلى كل مرة بتجيبى ابنك وتقعدى تذاكري له ( بتخسرى أديه تواصل بينك وبينه وبتبنى حواجز أديه بينك وبينه ....) ما هو مع الضغطه اللى انتى فيه أكيد مره عصايه على الماشى ولطشة على الماشى وتكشيرة على الماشى ولطمه على الماشى وصوات على الماشى وكلام حضرتك عارفه اكيد على الماشى .... وكتييييير
==========================
والكلام ده للى لسه أولادهم فى (كى جى) أو حتى فى السنوات الاولى من المرحلة الابتدائية يلحقوا يعودوا أولادهم على كده وهم لسه فى بداية اثبات ذاتهم وهم فى مرحلة بيبقوا عايزين يعملوا كل حاجة لوحديهم وبيبسطوا من التشجيع والمدح وبيفرق معاهم تحفيزك ولو بنبون وكتير من اولادنا بيبقى اول سنة ليه حضانة بيبقى عايز يكتب ويشغبط واحنا نقوله لا ونمسك ايده واكتب على السطر ومش عارف ايه فبنقتل عنده الاستقلالية واثبات الذات وان يثبت قدراته ......
============
طيب نيجى للجد بقى !!!!!!!!!!
الام اللى مش ماشية على النظام التانى
وماشية على النظام الاول
تعمل إيه؟؟؟؟؟؟؟؟؟؟؟؟؟؟
ركزى معاياااااااااااااااااا.............
عندنا نوعين من الاولاد
أ- نوع شاطر وممتاز وتركيزه حلو
فحضرتك لازم تعمل اللى اقولك عليه فى الخطوات اللى جايه دى علشان تسحبى نفسك منه واحدة واحدة ....
1-لازم علاقتك تكون بيه قويه وبالاخص (نفسيا و وجدانيا) الكلام ده هنوضحه أكتر فى الحلقة التالثة ( ومهمه جدا)لانه مش هيلين معانا ولا يطاوعنا الا ما تكون العلاقة بينك وبينه هادئة ومستقرة ودى هنفرد لها الحلقة التالتة ان شاء الله
2- تنسحب تدريجياً بمعنى لو كنتى بتقعدى معاه خمس اوست ايام فى الاسبوع هتبدأ تنسحبى يوم فى الاسبوع الاول وفى الاسبوع الثانى يومين وفى الاسبوع الثالث ثلاث ايام وفى الاسبوع الرابع هتنسحب الخمس ايام على مدار شهر تقريبا يكون بيقعد لوحده وهيكون كالتالى
===========
هتتعاملى معاه بالطريقة اللى جايا دى وياريت لو الاب معاكى يبقى رائع
===========
(انت ليك عندى مكافأة النهارده ومجهزه لك هديه جميلة لو كتبت الواجب النهارده لوحدك ...أو المعلمة كلمتنى النهارده وبتقول (أحمد) شاطر وبيكتب لوحده عايز أشوف بقى النهارده كتبت مع المعلمه لوحدك ازاى علشان نورى بابا بابا هيبسط كتيير أوى ....)
(أو عن طريق التواصل مع المعلمة توعد الاطفال اللى هيكتب الواجب النهاردة لوحده ليه عندى جايزة كذا وتكونى انتى اللى ممكن تجيب الهدية وتعطيها للمعلمة ....)
(أو توعديه انك هتلعب معاه النهارده بس بشرط يكتب الواجب لوحده وتكونى مجهزه مثلا كراسة رسم والوان وتلعبى معاه ...أو تلعبى معاه بوكس وملاكمة أو تجهزى له قصه ...أو حاجه بيحبها ... وهكذا)
(أو توعديه انه لو كتب الواجب لوحده ..انا هجيلك بكره الحضانة واجيب لك بنبون انت واصحابك وتروحى ادام الفصل وتقوليه (أحمد )حبيبى شاطر وبيكتب الواجب لوحده أدام الفصل كله ...هتفرق معاه كتير .....)
وعموما لو فيه حاجة مش فاهمها انتى بتوضحى بس وتسيبيه يعملها لوحده كحل المسائل او بتكتب ازاى دى وهكذا ... مع التشجيع المستمر له (انا عارف انك هتعرف تكتب لوحدك ... انت شاطر ومش محتاج حد يساعدك والمعلمة قالتلى كده ...وهكذا)
(أو توعديه لو كتبت الواجب لوحدك الاسبوع ده او الثلاث ايام الجايين ليك عندى كذا (التحفيز)... وفى الحالة دى نخلى التحفيز بشكل مختلف زى لك سبورة الوان ..اسكتش رسم والوان فلومستر مثلا ويلعب تحت مراقبتك انتى ..نعمل عجينة الصلصال سوا ونلعب وهكذا (لازم نشغل مخنا شوية فى موضوع التحفيز ونخليه بشكل غير تقليدى...)
(....طيب ده لو كانت المعلمة كويسة وممتازة والطفل كويس وممتاز ...
ب- طيب لو كان العكس ( المعلمة مش أد كده والطفل ايضا تركيز ومسستواه متوسط او ضعيف).. هنكمله فى الحلقة الجاية
وده كله مع استقرار علاقتك بيه اللى هنتكلم عنه برضه فى الحلقة التالتة
أنا مش هكتر عليك لانى وجعت دماغك وانا عارف ومقدر كم الضغط اللى عليك بس الاهم عرفنا الفرق بين النظامين
==================
فى الحلقة التالته هنكمل وهنتكلم على إزاى أحببه فى المذاكرة ولو عنده لامبالاه أعمل إيه ولو هو كبير شوية هأعمل إيه وعن كل المشاكل اللى بتقابلنا
وهنتكلم عن الام البديلة ( وبقول الام البديلة ) ( مش الزوجه التانية علشان محدش يفهمنى صح ... ربنا يكرمكم ويعزكم ويعلى قدركم )
مرحباً بالتعليقات الجديدة .